لاہور(کرائم رپورٹر)رمضان کی مناسبت سے پنجاب میں قیدیوں کی سزاؤں میں 60 دن کمی کا اعلان کیا گیا ہے۔
وزیرِاعلی پنجاب عثمان بزدار کی ہدایت پر آئی جی جیل خانہ جات پنجاب مرزا شاہد سلیم بیگ نے رمضان المبارک کی مناسبت سے پنجاب بھر کی جیلوں میں مقید قیدیوں کے لیے 60 دن کی سزاوں میں کمی کا اعلان کیا ہے، سزاؤں میں کمی پاکستان پریزن رولز 1978 کے رول 216 کے تحت کی گئی ہے، اور اس کا اطلاق ان تمام قیدیوں پر ہوگا جو رواں سال جیل قوانین کی خلاف ورزی میں ملوث نہ ہوں گے.
سزاؤں میں کمی کا اطلاق دہشت گردی، منشیات اور حدود آرڈیننس کی دفعات کے تحت سزا ہونے والے قیدیوں پر نہیں ہوگا، مالی غبن اور قومی خزانے کو نقصان پہنچانے والے قیدی بھی اس ریلیف سے استفاد نہیں کرسکتے، اس اعلان کے تحت 150 قیدیوں کو سزاؤں میں کمی کے طور پر فائدہ پہنچا ہے، اور ان قیدیوں اور ان کے ورثاء نے خوشی کا اظہار کیا ہے۔
