لاس اینجلس(مانیٹرنگ سیل)امریکا کے شہر لاس اینجلس میں اداکارہ و ماڈل ڈینس رچرڈز اور ان کے شوہر کی گاڑی پر نامعلوم شخص نے فائرنگ کردی۔
ڈینس رچرڈز اور ان کے شوہر کی گاڑی پر فائرنگ اسٹوڈیو کے باہر پارکنگ ایریا میں کی گئی جس میں دونوں افراد بال بال بچ گئے۔
غیرملکی میڈیا کے مطابق ڈینس رچرڈز کے شوہر گاڑی چلا رہے تھے، اسٹوڈیو پہنچنے پر پارکنگ کی تلاش کے دوران ان کی گاڑی کے پیچھے موجود دوسری گاڑی میں سوار شخص نے غصے میں چیخنا شروع کردیا۔
رپورٹس کے مطابق ملزم نے اپنی گاڑی اداکارہ کی گاڑی کے آگے لانے کی کوشش کی۔
رپورٹس کے مطابق اداکارہ کے شوہر نے ملزم کو جگہ دی تاہم پھر بھی اس نے ان کی گاڑی پر فائرنگ کی۔
غیرملکی میڈیا کے مطابق فائرنگ سے اداکارہ گھبرا گئیں اور روتے ہوئے اسٹوڈیو میں داخل ہوئیں جس کے بعد کریو ممبر نے گاڑی پر گولی کا نشان دیکھ کر پولیس کو اطلاع دی۔
رپورٹس کے مطابق دونوں شخصیات پر فائرنگ کے واقعے کی پولیس نے تحقیقات شروع کردی ہیں
